Net op die platteland…(‘n interteks)

Jump to Comments

Feit: ek is nie vertroud met die term ‘tyd’ nie. Een van die oneindige gevolge hiervan, is dat my laaste biblioteekboek ‘n skamele twee maande laat was. Ek het dié boek vanmiddag ontdek waar dit doodluiters in ‘n leë vistenk in my kamer – tussen gedroogde blomblare genessel was (terloops, dié vistenk was na my verjaarsdag ingespan as houer vir die blomme – blompotte is só mainstream).

Terug by die oorspronklike storie – die plattelandse boetesisteem is nog meer kostelik as wat ek onthou (ek weet, ek is self ‘n volbloed-plattelander, maar dit gee my soveel meer reg om hiermee te spot). Die biblioteektannie het gefluister dat ek die volle prys van die boek sowel as die boetegeld moes betaal. Vir ‘n oomblik was ek benepe. Sy het op so klein, ou sakrekenaartjie die somtotaal bepaal: R27.50, maar ek kry 50c afslag (as dit nie was vir die stilte-bordjie nie, het ek gejodel). Die tannie haal toe so dik, blou rol uit die kas en begin papiertjies aftel – 27 daarvan. 

So het dit gekom dat ek by Swellendam se biblioteek  uitstap met ’n fonds van een lang string blou papier wat agter my aanwapper soos ‘n vlag wat my onvergeefbare sonde uittrompetter (of uitxilofoon, as jy wil). Wat ek daarmee moet doen, weet ek en heel waarskynlik munisipale werkers ook nie, maar ek dink dis kostelik.

31 Kommentaar

Filed under Uncategorized